اسلام آباد۔11جنوری (اے پی پی) وفاقی وزیر بین الصوبائی رابطہ (آئی پی سی) احسان الرحمان مزاری نال پاکستان اچ ارجنٹائن دے سفیر لیوپولڈو فرانسسکو سورس اسلام آباد اچ ملاقات کیتی جیں اچ وفاقی وزیر فٹبال ورلڈ کپ اچ ارجنٹائن دی کامیابی تے سفیر کوں مبارخ ݙتی وفاقی وزیر آکھیے ݙوہیں ملکاں وچال کھیݙاں بالخصوص فٹ بال، پولو، سکواش اتے کوہ پیمائی دے شعبیں اچ تعاون دی وݙی گنجائش اے۔ انہاں مزید آکھیے پاکستان نینگراں دی وݙی تعداد تے مشتمل ملک اے، تے کھیݙاں دے میدان اچ نینگراں دیاں صلاحیتاں کوں ودھاوݨ کیتے ٻہوں وݙی سرمایہ کاری تھی سڳدی اے ۔ وفاقی وزیر اے خواہش ظاہر کیتی اے جو پاکستان فٹ بال دی کوچنگ اتے تربیت اچ ارجنٹائن دے انمول تجربے اتے مہارت توں کافی سکھ سڳدے۔ آئی پی سی دے وفاقی وزیر پاکستان دی تریمت فٹ بال کھلاڑیاں کیتے فٹ بال کوچنگ اتے تربیت دے امکانات بارے وی ڳالھ کیتی ۔ سفیر ݙسائے جو ایں سلسلے اچ انہاں وزیراعظم دی معاون خصوصی یوتھ افیئرز پاکستان دے نال تفصیلی ڳالھ مہاڑ کیتی تے ݙو پاسے تعاون متعلق ٻہوں سارے معاملات تے ڳالھ مہاڑ کیتی ڳئی جنہاں اچ خاص طور تے نینگرں تے توجہ ݙتی ڳئی اے۔سفیر اپݨی خواہش دا اظہار کیتے جو ارجنٹائن دی حکومت پاکستان نال خاص طورتے کھیݙاں دے شعبے اچ لمبی مدت رابطے چاہندی اے ۔ انہاں اڄوکے سال دے شروع اچ ارجنٹائن دی تریمت فٹ بال کھلاڑیاں دے ممکنہ دورہ پاکستان بارے وی ڳالھ کیتی، تاں جو پاکستان اچ تریمت فٹ بال کھلاڑیاں دی تربیت اتے کوچنگ کیتی ونڄ سڳے ۔ انہاں مزید آکھیے کوئٹہ توں تعلق رکھݨ آلی پاکستانی تریمت فٹبال کھلاڑیاں اچ ایں کھیݙ کیتے ٻہوں چنڳاں ٹیلنٹ اے۔ ملاقات اچ سانجھے طور تے تجویز ݙتی ڳئی اے جو ݙوہیں ملک ݙو پاسے تعلقات دی ترقی کیتے کھیݙاں دے ماہرین دے تبادلے تے رل تے کم کرسڳدن تے کھلاڑیاں اچ نشہ آوردوائیں دے استعمال ( ڈوپنگ )دی لعنت دے خلاف وی رل تے جدوجہد کر سڳدن۔
