اسلام آباد۔14مارچ(اے پی پی)وفاقی وزیر اطلاعات و نشریات مریم اورنگزیب آکھیے جو ثاقب نثار چیف جسٹس آف ان جسٹس آف پاکستان ہن جیندے فیصلے ادارے دی شرمنگی ٻݨین، عمران خان ملکی تاریخ دا پہلا صادق و امین دے جیڑھا پورا ڈیکلیئر نئیں تھیا، جیکر اڄ پی ٹی آئی آلے الیکشن کمیشن دے نال کھڑن تاں اے ول ممنوعہ فنڈنگ کیس اتے توشہ خانہ کیس دے فیصلاں دے وی نال تھیون جیڑھے انہاں کوں چور ثابت کریندن، اے توشہ خانہ لٹ تے پالیسیاں بلدیندے رہین۔ اسلام آباد اچ پریس کانفرنس کریندے وفاقی وزیر اطلاعات آکھیا جو وزیراعظم شہباز شریف پنجاب سودھا سارے صوبیاں کوں ہدایت کیتی اے جو او لوکاں کوں رمضان اچ مفت اٹا ݙیون، حکومت پنجاب یوٹیلٹی سٹورز تے مفت اٹا ݙیوݨ شروع کر ݙتے، اٹے دی شفاف ونݙ کیتے وزیراعظم ہک مانیٹرنگ کمیٹی وی ٻݨائی اے جو حقدار کوں حق ملے، پنجاب اچ 8 کروڑ لوکاں کوں مفت اٹا ونݙیا ویسی۔ انہاں آکھیا جو اوکھے معاشی حالات دے باوجود حکومت لوکاں کوں سوکھ ݙیوݨ کیتے اے پروگرام شروع کیتے حالانکہ عمران خان دے شروع کیتے ڳئے آئی ایم ایف پروگرام نال حکومت دے ہتھ ٻدھیے ہوئن۔ انہاں آکھیا جو لوک عمران خان دی سیاست مسترد کرچکین، پہلے اے دھمکیندن ول معافیاں منڳدن، سائفر کھیݙدن، انہاں دی سازش باجوے توں تھیندی محسن نقوی تے آن مُکی اے۔ انہاں آکھیا جو اڄ ملک اچ ݙیوالا تھیوݨ دے خطرات اتے مہانگ دا ذمہ دار عمران خان اے، عمران خان لانگ مارچ اچ اپݨے آپ کوں گولی مروائی، کارکن مروائن، ٻیا اے کتنے ٻال یتم کریسن۔
