اسلام آباد ۔ 16 مارچ (اے پی پی) وزیر داخلہ پروفیسر احسن اقبال آکھیے جو حکومت دہشت گردی، توانائی تے معیشت دے بحراناں نال نبڑنڑ دے نال نال ٹیکنالوجی تے علم دے شعبے اچ وی بنیادی اقدامات کیتن جیں دے آندے وقت اچ اثرات سامنڑے آویسن ،پاکستان ہنڑ ٹیک آف پوزیشن اچ ہے ،مایوسی دیاں گالھیں نی کرنڑیاں چاہیدیاں ،2013اچ جیں ملک کوں دنیا دا خطر ناک ملک قرار ڈتا ویندا پیا ہئی اج ایشیا دی ابھردی ہوئی معیشت قرار ڈتا ویندا پے ۔دنیا اساڈے نال رل تے کم کرنڑ چاہندی اے ۔پسماندہ علاقیں اچ وی یونیورسٹیاں تے کیمپس کھولیے ہن ،ہر نینگر کوں لیپ ٹاپ ڈتا ویسی کیوں جو اے تعلیم سانگے ضروری اے ۔اساکوں دنیادیاں ڈوجھیاں قوماں نال رل تے چلنڑ دی ضرورت اے ۔ جمعے کوں نیشنل یونیورسٹی آف سائنس اینڈ ٹیکنالوجی (نسٹ) میں نیشنل سینٹر آف آرٹیفشل انٹیلیجنس دی افتتاحی تقریب نال خطاب کریندے ہوئیں انہاں آکھیا جو پاکستان کوں دوجھیاں قوماں نال قدم نال قدم رلا تے چلنڑ دی ضرورت اے اساکوں آندے وقت دے تقاضیں کوں سمجھ تے خود کوں ایںسانگے تیار کرنڑاں چاہیدے تے خود کوں تبدیلی دے حالات دے رحم کرم تے نی چھونڑڑاں چاہیدا ۔اساں آندے وقت دے چیلنج نال نبڑنڑ سانگے خود کوں تیار نہ کیتا تاں مسم ویسوں ۔بدقسمتی نال ایجادات اچ اساں پچھی تے رہ گیوں ،حالانکہ اساکوں ساریں توں اگی تے ونجنڑاں چاہیدا ہئی اج مسلمان سائنسدان کتھائیں وی نظر نی آندے پے ،اساڈے معاشرے اچ جہاد کرنڑ آلیں دی کوئی گھٹکی کائنی لیکن نوبل انعام جتنڑ آلے سائنسدان ناپیدہن ۔ اگر اساں سائنس و ٹیکنالوجی تے دسترس حاصل کروں تاں دنیا اچ کہیں کوں اساڈی توہین کرنڑ دی جرات کائناں تھیسی ۔سائنس تے ٹیکنالوجی دے میدان اچ جیرھیاں قوماں قیادت کریندیاں پن انہاں دی دنیا اچ عزت تے طاقت اے ۔وزیر داخلہ تختی دی گھنڈ کھلائی کرتے سینٹر دا افتتاح وی کیتا۔ ایں موقع تے مختلف یونیورسٹیاں دے وائس چانسلرز، ایچ ای سی تے پلاننگ کمیشن دے سینئر حکام وی موجود ہن۔
.jpg)
