اسلام آباد۔18اگست(اے پی پی) نگران حکومت آزادانہ اتے منصفانہ انتخابات کیتے الیکشن کمیشن دا ہتھ ونݙاوݨ، آئین دے مطابق آندے انتخابات تئیں معاملات ݙیکھݨ، معاشی بحالی کیتے سرکاری اخراجات اچ کمی دا فیصلہ کیتے۔ اے فیصلہ اسلام آباد اچ نگران وفاقی کابینہ دے پہلے اجلاس اچ کیتا ڳئے جیندی اڳواݨی نگران وزیراعظم انوار الحق کاکڑ کیتی۔ اجلاس اچ فیصلہ کیتا ڳئے جو نگران کابینہ اپݨے حلف اتے آئین و قانون دے مطابق کم کریسی، پاکستان دے آئین دے مطابق ملک عوام دے منتخب نمائندے چلیسن اتے نگران حکومت آندے انتخابات تئیں ملکی معاملات ݙیکھسی، آندے عام انتخابات کیتے تعاون اتے ضروری تقرر و تبادلیاں کیتے سفارشاں تے عمل درآمد سانڳے وفاقی کابینہ الیکشن کمیشن نال پورا ہتھ ونݙیسی جو ملک اچ آزادانہ انتخابات یقینی ٻݨائے ونڄن۔ کابینہ اڄوکی معاشی صورتحال پاروں اے وی فیصلہ کیتے جو حکومت سرکاری اخراجات اچ کمی کریسی اتے بچت پالیسی اپنیسی جو عوام دا پیسہ بچایا ونڄ سڳے۔ کابینہ آکھیے جو پٹرولیم مصنوعات عالمی مارکیٹ دے مطابق ݙتیاں ویسن، آئی ایم ایف معاہدے پاروں کہیں شے تے سبسڈی نہ ݙتی ویسی۔ کابینہ اے عزم دوہرائے جو ریاست ملک اچ اپݨیاں اقلیتاں نال کھڑی اے، کہیں کوں مذہب، رنگ یا ذات دے ناں تے نشانہ ٻݨاوݨ دی اجازت نا ݙتی ویسی، ملک اچ سارے شہریاں دے حقوق ہکو سویں ہین،ملک اچ اظہار رائے دی آزادی کیتے اقدامات کیتے ویسن۔
