اسلام آباد۔21ستمبر(اے پی پی)وزیر خارجہ شاہ محمود قریشی ڄڳ کوں توجہ ݙیوائی اے جو او ایں اہم موقع تے افغانستان توں منہ نہ موڑے افغانستان دے امن کیتے آپݨی ذمہ واری نٻھاوے۔ سی این این تے اپݨے ہک مضمون اچ وزیر خارجہ آکھیا جو اڄ ہکو اری ول افغانستان توجہ دا مرکز ٻݨیا ہوئے، جتھاں صورتحال تے پورے ڄڳ کوں چنتا اے، چیلنج اے ہے جو افغانستان اچ اپݨے اپݨے مفادات توں ہٹ تے امن و استحکام کیتے رل تے کم کریڄے، 4 ݙھاکیاں توں ظلم دے مارے افغانیاں کوں سکھ ݙیوݨ دی لوڑھ اے، پاکستان سب توں ودھ چاہندے جو افغانستان اچ امن و استحکام آوے جو اے ساݙے فیدے دی ڳالھ اے، اساں نہ ٻئی بدامنی برداشت کر سڳدے ہیں نہ ٻئے افغان مہاجرین دا ٻھار چا سڳدے ہیں، جو اساں پہلے ہی دہشت گردی دے خلاف جنگ اچ 80 ہزار توں جاناں دی قربانی ݙتی اے، 40 لکھ توں ودھ افغان مہاجرین سنٻھالین، 150 ارب امریکی ڈالر توںو دھ مالی نقصان چاتے، ساکوں الزام تراشی دے کھیݙ اتے غیر حقیقی توقعات ٻہوں ازمائے، بھل اساں افغانستان دے امن کیتے ہمیشہ ثابت قدم رہے ہیں۔ انہاں آکھیا جو امریکہ، طالبان مذاکرات اچ وی پاکستان کردار ادا کیتے، افغانستان توں انخلا دے ویلھے اچ وی پاکستان ہی کمیں آئے۔ شاہ محمود قریشی آکھیے جو اڄ افغانستان اچ تاریخ دا رخ بدل ڳئے، بھل اساں خطے اچ استحکام دا نواں دور شروع کر سڳدے ہیں، مغرب اپݨے معاشرتی نظریہ دے مطابق افغان معاشرے کوں ڈھالݨ دی سوچ چھوڑ ݙیوے، پاکستان انسانی حقوق دے تحفظ، بالخصوص تریمتیں اتے چھوریں اتے افغان آبادی دے انتہائی کمزور طبقات دے تحفظ دی حمایت کریندے ہیں، اساں انڄھا افغانستان چاہندے ہیں ڄیڑھا اپݨے نال نال، اپݨے ہمسایاں اتے ڄڳ نال امن اچ راہون۔
