اسلام آباد۔26جنوری(اے پی پی)وفاقی کابینہ براڈشیٹ معاملے تے تحقیقات کیتے کمیٹی دے بجائے کمیشن آف انکوائری ایکٹ2017 دے تحت کمیشن بݨاوݨ تے اتفاق کیتے، انکوائری کمیشن براڈشیٹ معاملہ سامݨے آوݨ تئیں دی مدت دی تحقیقات کریسی، کمیشن کہیں وی شخص یا ادارے کوں سݙ تے دستاویزات ڳھنݨ دا اختیار رکھدے ڄݙاں جو کابینہ کورونا ویکسین دی درآمد کیتے وزارت برائے نیشنل ہیلتھ سروسز،ریگولیشنز اینڈ کوآرڈینیشن دی سفارشات دی منظوری ݙتی اے اتے آکھیے جیکر لوڑھ پئی تاں سینٹ الیکشن شفاف کراوݨ کیتے اوپن بیلٹ الیکشن کیتے آئینی ترامیم وی کیتی ویسی۔ اے فیصلے وزیر اعظم عمران خان دی اڳواݨی اچ کابینہ اجلاس اچ کیتے ڳین۔ کابینہ کوں حکومت دی ٹاسک فورس برائے کفایت شعاری وتنظیم نو ولوں وزارتاں، ڈویزنز اچ 70 ہزارخالی آسامیاں مکاوݨ، وفاقی اداریاں دی تعداد441 توں ڳھٹا تے 324 رکھݨ کیتے ادارہ جاتی اصلاحات تے بریفنگ ݙتی ڳئی۔ کابینہ اچ ست اداریاں دی بحالی بارے ݙسایا ڳیا۔ کابینہ کوں جولائی تا دسمبر 2020ء اچ اقتصادی ومعاشی اعشاریاں اچ ودھارے تے بریفنگ ݙتی ڳئی۔کابینہ نیشنل ڈیزاسٹررسک مینجمنٹ فنڈ کوں وزارت برائے منصوبہ بندی ترقی واصلاحات اتے سپیشل انیشیٹو دے زیر انتظام کرݨ سودھا ادارے دے مستقبل دے تنظیمی ڈھانچے بارے کمیٹی دی سفارشات دی منظوری ݙتی۔ ایندے علاوہ کئی اہم اقدامات تے پیش رفت دا جائزہ وی ڳھدا گیا۔
