اسلام آباد۔25جون(اے پی پی) قومی اسمبلی آندے مالی سال 2023-24 کیتے 14.48 ٹریلین روپے دے وفاقی بجٹ دی منظوری ݙے ݙتی اے۔ بجٹ تجاویز کوں قانونی تحفظ ݙیوݨ کیتے مالی بل 2023-24 دی وی منظوری ݙتی۔ قومی اسمبلی اچ وفاقی وزیر خزانہ سینیٹر محمد اسحق ڈار تحریک پیش کیتی جو مالی بل 2023-24 زیر غور ڳھن آیا ونڄے۔ ایوان تحریک دی منظوری ݙتی۔ بعد اچ وزیر خزانہ محمد اسحق ڈار مالی بل ایوان اچ پیش کیتے۔ سپیکر قومی اسمبلی راجہ پرویز اشرف بل دیاںس اریاں شقاں کوں ایوان اچ منظوری کیتے پیش کیتے جیندے اچ مولانا عبدالاکبر چترالی، سائرہ بانو، نثار چیمہ، زہرہ ودود فاطمی، نواب شیر وسیر، آسیہ عظیم اتے ٻئے مختلف شقاں تے ترامیم پیش کیتن جیڑھیاں ایوان کثرت رائے نال مسترد کر ݙتن ڄݙاں جو مولانا عبدالاکبر چترالی دی ہک ترمیم ایوان بل اچ شامل کرݨ دی منظوری ݙے ݙتی۔ وزیر خزانہ اسحق ڈار تحریک پیش کیتی جو آندے مالی سال دے بجٹ کوں قانونی تحفظ ݙیوݨ کیتے مالی بل 2023-24 منظور کیتا ونڄے، قومی اسمبلی بل دی منظوری ݙے ݙتی۔ سینیٹ تجاویز سانڳے وزیر خزانہ ولوں مالی بل 2023-24 اچ پیش کردہ ترامیم دی وی ایوان منظوری ݙتی۔ 9 جون کوں ایوان اچ پیش تھیوݨ آلے وفاقی بجٹ دی تجاویز تے نویں سرو غور دٌے بعد وزیر خزانہ محمد اسحق ڈار ایوان اچ بجٹ بحث اتے سینیٹ تجاویز کیتے بجٹ اچ ریونیو اہداف اتے ٻئے کڄھ معاملیاں تے کڄھ تبدیلیاں دا اعلان کیتے جیویں، ایف بی آر دے محاصل دا ہدف 9200 ارب توں ودھ تے 9415 ارب روپے تھی گیا، صوبیاں دا 5276 ارب روپے توں ودھ تے 5390 ارب روپے تھی گیا، وفاقی حکومت دے اخراجات 14460 ارب روپے توں ودھ تے 14480 ارب روپے تھئے، پنشن دا حجم 761 ارب روپے توں ودھ تے 801 ارب روپے تھی گیا، سبسڈی دا حجم 1064 ارب روپے ڄݙاں جو گرانٹس دا حجم 1405 ارب روپے ہوسی، ایں سانڳے بجٹ خسارے اچ بہتری آسی، مالیاتی خسارہ 300 ارب روپے ڳھٹ ویسی۔
