بیجنگ۔2نومبر(اے پی پی)وزیراعظم محمد شہباز شریف دی دعوت تے وݙیاں چینی کمپنیاں پاکستان اچ مشترکہ منصوبیاں خاص کر شمسی توانائی اتے انفراسٹرکچر منصوبیاں اچ سرمایہ کاری اچ دلچسپی ݙکھیندے کراچی اچ پیوݨ دے پاݨی سودھا ٻئے وݙے منصوبیاں اچ سرمایہ کاری دا یقین ݙیوائے۔ اے یقین دہانی وزیراعظم محمد شہبازشریف نال چین دیاں وݙیاں کمپنیاں دے نمائندیاں ملݨ ویلھے کیتی۔ وزیراعظم چینی کمپنیاں کوں 10 ہزار میگا واٹ شمسی توانائی دے منصوبے تے کٹھے کم کرݨ دی پیشکش کیتی اتے گوادر ہوائی اڈے تے کم تیکھا کرݨ اتے ایکوں ایں سال ہر صورت پورا کرݨ تےز ور ݙتے۔ متعلقہ چینی کمپنی آندے سال دے شروع اچ گوادر ہوائی اڈہ مکمل کرݨ دا یقین ݙیوایا۔ وزیراعظم آکھیا جو اقتدار ملݨ توں بعد حکومت چینی کمپنیاں دے مسئلے حل کیتن، چینی کمپنیاں کوں 160 ارب روپے دی ادائیگی کیتی اے، پچھلے ݙینھ 50 ارب روپے ݙتن اتے 50 ارب روپے نال ریوالنگ فنڈ اتے ایں سانڳے سٹیٹ بینک ریوالونگ اکائونٹ وی ٻݨا ݙتے، ادائیگیاں دے نال ہی ٻئے 50 ارب روپے ایندے اچ آویسن، دیامر بھاشا ڈیم منصوبے اچ زمین دے مسلے حل کیتے ویسن۔ وزیراعظم آکھیا جو چینی کمپنیاں کوں سکون نال کم کرݨ کیتے مناسب سیکیورٹی اتے ٻیاں سہولتاں ݙتیاں ویسن، سی پیک سودھا ٻعے منصوبیاں تے کم تیکھا کرݨ اچ ہتھ ونݙایا ویسی اتے چینی شہریاں دا تحفظ یقینی ٻݨایا ویسی۔ وزیراعظم ہوا نال بجلی ݨاوݨ دے منصوبیاں اچ سرمایہ کاری دی وی دعوت ݙتی۔
