راولپنڈی ۔12دسمبر (اے پی پی) ڈیرہ اسماعیل خان اچ سکیورٹی فورسز دے انٹیلی جنس بیسڈ آپریشنز اچ 27 دہشت گرد ماریے ڳئے، سکیورٹی فورسز دی چوکی تے حملے، فائرنگ دے تبادلے اچ پاک فوج دے 25 جوان شہید تھیے۔ آئی ایس پی آر موجب11 اتے 12 دسمبر 2023 دی وچلی رات ضلع ڈیرہ اسماعیل خان اچ دہشت گرداں دی موجودگی دی اطلاعات تے آپریشن کیتا ڳئیا جئیں اچ دہشت گرداں دے ٹکاݨے کوں تباہ کر ݙتا ڳئیا اتے 17 دہشت گرداں کوں جنہم واصل کر ݙتا ڳئیا۔ کلاچی اچ انٹیلی جنس دا ہک ٻئے آپریشن اچ دہشت گرداں دے ٹکاݨے کوں نشانہ ٻݨایا ڳئیا جئیں اچ چار دہشت گرد ماریے ڳئے۔ شدید فائرنگ دے تبادلے اچ پاک فوج دے ݙو جوان شہید تھیے۔ ماریے ڳئے دہشت گرد سکیورٹی فورسز اتے معصوم شہریاں تے حملیاں اچ ملوث ہن۔ کاروائیاں اچ اسلحہ، گولہ بارود اتے دھماکہ خیز مواد وی برآمد کیتا ڳیا۔ 12 دسمبر دی سویل چھی دہشت گرداں دے ہک گروہ درابن اچ سکیورٹی فورسز دی چوکی تے حملہ کیتا۔ دہشت گرداں کوں چوکی اچ وڑݨ اتے بارود نال بھری ڳاݙی آوݨ توں روکیا ڳئیا تاں انہاں خودکش حملہ کیتا جئیں اچ دھماکے پاروں عمارت ݙہہ پئی۔ ایں واقعے اچ 23 جوان شہید تھین۔ ویلھے تے جوابی کاروائی اچ چھی دہشت گرداں کوں جنہم واصل کیتا ڳئے۔ علاقے اچ موجود کہیں وی ٻئے دہشت گرد کوں ختم کرݨ کیتے سینی ٹائزیشن آپریشنز کیتے ویندے پئن۔
