اسلام آباد۔25دسمبر (اے پی پی):سپیکر قومی اسمبلی اسد قیصر اتے ڈپٹی سپیکر قاسم خان سوری کرسمس دے پر مسرت موقع تے پاکستان اچ وسݨ آلی مسیحی برادری اتے مسیحی برادری توں تعلق رکھݨ آلے اراکین پارلیمنٹ کوں کرسمس دی مبارخ باد ݙتی اے جیڑھا جو ہر سال حضرت عیسیٰ ؑ دے یوم پیدائش دے موقع تے پوری دنیا اچ عقیدت و احترام نال منایا ویندے ۔ایں موقع تے سپیکر اپݨے پیغام اچ آکھیے جو اللہ تعالی حضرت عیسیٰ ؑ کوں محبت،امن،برداشت اتے بھرپی دی تبلیغ کیتے مبعوث فرمایا۔انہاں آکھیا جو مسلمان حضرت عیسیٰ علیہ السلام کوں اللہ تعالیٰ دا برگزیدہ پیغمبر منیندن تے دلوں انہاں دی تعظیم و احترام کریندن ۔انہاں آکھیے جو کرسمس دا ݙینھ اساکوں نویاں امیداں اتے منصوبیں دی شروعات،تحقیقی صلاحیتاں کوں اجا گر کرݨ، جھیڑیں دے حل تے آندیاں نسلاں دے بہتر مستقبل کیتے امن اتے تعاون کوں ودھارا ݙیوݨ دا درس ݙیندے ۔انہاں آکھیے ایں ویلھے دنیا کوں کویڈ 19وبا دا سامݨا اے جیں دا مقابلہ کرݨ کیتے ،سانجھے اتحاد و یکجہتی اتے احتیاطی تدابیر تے سختی نال عملدآمد کرݨ دی لوڑھ اے ۔
